Mini HEAT caravan sa
Clarin, Sept 25 Lunes
TAGBILARAN CITY, September 13, (PIA)—Alang sa katawhan sa Clarin, libre nga serbisyo ug mga gasa gikan sa 36 ka kahugpungan ug mga ahensya sa kagamhanan ang tanyag alang sa Mini HEAT Caravan sa lungsod karong September 25, Lunes.
Gibutyag ni Mayor Allen Ray Piezas nga ang Mini HEAT Caravan, lakip na sa mga kalihukan sa pagpangandam sa tinuig nga kapistahan sa lungsod.
Ang Mini Heat caravan mao nay gihimo nga tanyag sa kagamhanan sa Bohol human nakit-an ang panginahanglan nga ipadayon ang kanhi binuwan nga Civic Action ngadto na sa kausa sa matag duha ka buwan.
Ang HEAT Caravan, usa ka pamaagi sa pagdala sa serbisyo sa kagamhanan ngadto sa katawhan sa kalungsuran ug magplastada sa mga serbisyo sa Health ug Sanitation, Education, Agriculture ug Tourism, lakip na ang Information Technology.
Sa iyang pagpakighinabi sa media, gisaysay usab sa mayor nga ang HEAT caravan, nga gidumala sa Kagamhanang Probinsyal sa pagpakigtali sa LGU Clarin, ilang gitumong aron makahatag og dyutay nga alibyo sa mga molupyo sa lungsod nga apektado sa duguong pagtapnas sa mga armadong teroristang Abu Sayyaf.
Matud ni Mayor Piezas kinsa kanhi presidente sa mga Mayor sa Bohol, particular nilang gitumbok nga alagaran ang mga molupyo sa 13 ka barangay nga direktang nahulga sa pag-ipsot sa mga terorista human sila gika-engkwentro sa kasundalohan ug kapolisan didto sa silingan nga lungsod sa Inabanga.
Apan, dili usab mahimo nga mahikawan ang nahibilin nga molupyo sa 9 ka barangay nga sakop sa lungsod nga molugsong alang sa service caravan.
Lakip sa mga serbisyo nga itanyag, dugang sa Mayor mao ang medical ug dental services, livelihood lectures, libreng seedlings, mga livestock, gamit ug tambag sa panguma, ug daghan pa.
Andam na ang tanan, gawas na lang sa gihipno nga gagmay nga detalye alang sa pagpahiluna sa mga ahensya sa ilang mga booth, ug sa pagbahin sa mga lugar sa lungsod nga himoan sa mga kalihukan nga apil sa serbisyong itanyag.
Ang Mini Heat Caravan usa lamang sa mga kalihukan nga giandam sa lungsod sa pagpadagan sa kapistahan sa lungsod nga giopanalipdan ni San Miguel Arkanghel. (rahc/PIA-7/PIA)